أنا معجزة

أنا معجزة متحركة!

مش قصدي خالص أفتخر بأي حاجة على فكرة!

أبدًا... مطلقًا... بتاتًا!

إنتَ كمان معجزة!

وإنتِ معجزة!

كل واحد فينا معجزة متحركة!

بتصحَى الصبح من النوم...
وتلاقي نفسك بتتنفس طبيعي...
والرئة تاخد شهيق وتطلَّع زفير...
وتلاقي البطل الجبَّار اللي اسمه قلبك شغَّال بكل أمانة وإتقان!
وتفتَّح عينك تلاقي نفسك بتشوف كل حاجة بوضوح...
وتسمع أصوات حواليك... أحيانًا مزعجة... معلهش، بس ودانك شغَّالة!
وتنزِّل رجلك على الأرض تلاقيها بتتحرك...
وتمشي...
وتروح وتيجي...
وتاكل... وتهضم...
وتشرب... وتخرج...

كل خلية في جسمك شغالة...
وفيه ملايين الملايين من الخلايا اللي شغالة في انسجام وتناغم مع بعضها طول الوقت...
مختلفة في العمل، والوظيفة، وممكن في الشكل كمان...
لكن كلها مشتركة في خصائص معيَّنة...
ومنها بتتكون أنسجة بيتكون منها أعضاء جسمك المُوَقَّر...

أقول إيه ولا إيه ولا إيه...
المُخ... دا قمة العبقرية والإتقان!
والحبل الشوكي... وشبكة الأعصاب... والخلايا العصبية...
القلب... دا أكتر واحد تعبان معانا بصراحة!
والأوردة والشرايين والأوعية الدموية...
والدم نفسه بكل مكوناته...
الكبد... بفصوصه الأربعة وإمكانياته الهائلة...
المعدة... بعصارتها وإنزيماتها...
الكُلْيَتان... شغالين تصفية طول الوقت!
البنكرياس...
الأمعاء... دي طويلة قوي على فكرة! بس ملفوفة في مكان ضيق قوي!
الرئتان... والحويصلات الهوائية...
الغدد بأنواعها... والهرمونات والمواد اللي بتفرزها...
العين... دي معجزة منفردة!
الأذن...
العضلات الكتيرة المتنوعة في الحجم والشكل والوظيفة...
الهيكل العظمي بكل تفاصيله... والغضاريف...
الأنف... دي بتعرف تلقط حاجات عجيبة!
الجلد... والشعر...
الأطراف... والأظافر...

ماكينات حَيَّة تعمل طول اليوم...
وكل يوم...
في انسجام تام...
وبكل أمانة وإخلاص...
على الرغم من إهمالنا ليها...
وعدم صيانتنا ليها...
(ودي حاجة سيئة طبعًا!)
لكنها تعمل دون توقُّف...
دون كَلَل...
ليلاً ونهارًا...

الخالق العظيم، المُبدِع الأروع...
مصممها تنضَّف نفسها بنفسها...
وتدافع عن نفسها ضد أي جسم غريب...
وتعالج نفسها بنفسها كمان...
تخيَّل إن كل مرة تتجرح والجرح يلتئم إنت بتتفرج على معجزة إلهية بتحصل قدامك وإنت مش واخد بالك!
معجزة فعلاً!
الأنسجة بترجع تبني نفسها من جديد، ومن تحت لفوق...
ولوحدها كدا! من غير ما تعمل لها حاجة!
المُصَنِّع بتاعها عاملها كدا!
معلمها تعمل كدا لوحدها!

وعايز تقول لي إن كل دا عادي؟!
حضرتَك وحضرتِك وأنا عبارة عن معجزة متحركة كل يوم!
العجيب إننا بنتعامل مع كل دا على إنه مُسَلَّم بيه!
ولا بنفكر فيه... إلا قليلاً!
ولا بنشكر ربنا عليه... إلا نادرًا!
وأهي الحياة ماشية!

عرفتوا بقى ليه أنا مش بأفتخر بأي حاجة؟!
أصل أنا ما ليش أي فضل في كل دا!
أنا بأفتخر باللي خلقني بهذا الإبداع الرائع!
بأفتخر باللي عملني بهذا الإتقان البديع!
وبأشكره!
وأرجوه وأدعو له إنه يعلمني أحافظ على الأمانة اللي سلمها لي وأرعاها وأهتم بيها!
وما أنساش أبدًا إن أنا معجزة!
وإنت كمان معجزة!