أطول نخلة

كان فيه واحد عايش في قرية...

عنده حتة أرض صغيرة...

زارع فيها نخلة!

اسمها "سكينة"...

على اسم أخته الكبيرة (اللي اتوفت من فترة)...

هي اللي رَبِّته من صغره بعد ما مات أبوه وأمه...

كان مشهور في البلد...

مش لأنه من الأعيان...

ولا عشان كان متنور ومتعلم...

لكنه كان مشهور بالنخلة بتاعته!

كان يمشي في البلد... بطولها وعرضها...

رافع راسه لفوق...

وفارد صدره...

وفي زهو يقول:

أنا عندي أطول نخلة في البلد!

وفعلاً النخلة بتاعته

كانت أطول نخلة في البلد!

كل الناس كانت بتحسده على طول نخلته!

وكل واحد كان يتمنى إن النخلة بتاعته تكون طويلة زي نخلته!

لكنها للأسف كانت نخلة عقيمة!

نخلة عقيمة!

ما بتجيبش بلح!

عمل معاها كل المحاولات...

لكن ما فيش أمل!

النخلة طويلة قوي...

لكنها من غير بلح!

بتقف شامخة وسط باقي نخيل البلد...

تشوفها من بعيد قبل ما توصل للبلد...

لكنها من غير بلح!

صاحبها بيها مسرور ومغرور...

لكنها من غير بلح!

وكل الناس في البلد كانت بتسأل:

إيه لازمة طول النخلة من غير بلح؟!