السعادة

Taken in May 2013 at Wadi El-Natroun, Egypt

"السعادة ليست فيما يمكنك الاحتفاظ به، بل فيما يمكنك الاستغناء عنه."

دي عبارة قريتها، وبصراحة مش عارف مين اللي قالها...

لكني موافق عليها جدًّا ومقتنع إنها حقيقية قوي...

فعلاً السعادة مش إنك تحصل على حاجات أكتر ولا إنك تحافظ على اللي عندك...

لكنها في اللي تقدر تتخلى عنه وتشعر بالرضا والارتياح إنك تركته...

جربت تتخلى عن حاجة بتحبها؟! القهوة مثلاً أو الشيكولاتة أو الآيس كريم!!!

جربت تتخلى عن الأكل والشرب لفترة معينة؟ تصوم يعني!

جربت تتخلى عن ملابس معينة بتفضَّلها؟!

جربت تعيش من غير موبايل؟ على الأقل لمدة يوم مثلاً!

طيب جربت تقفل الفيسبوك لمدة أسبوع أو شهر؟!

هو ضروري قوي كدا لدرجة إنه لا يمكن العيشة من غيره؟!

جربت تستخدم المواصلات بدل ما تركب العربية (بس يكون باختيارك مش لأن الطرق مقفولة عشان المظاهرات أو الاعتصامات)؟!

جربت تتخلى عن حاجات فاكر إنها ضرورية وحيوية، ولما سبتها واتعودت تعيش من غيرها قلت: "ياااه! دي طلعت مش ضرورية ولا حاجة!"؟!

مش كل حاجة مُلِحة ضرورية!

ومش كل حاجة مُلِحة مفيدة!

ومش كل حاجة مُلِحة تتعمل "هنا ودلوقتي"!

فيه سعادة بجد في الاستغناء عن حاجات... الواحد بيحس إنه مستريح... إنه خفيف... مافيش حاجة مثقلة على قلبه!

السعادة مرتبطة قوي بالرضا والإشباع والاستمتاع...

وعشان كدا السعادة مش مرتبطة بالأشياء في حد ذاتها...

لكنها مرتبطة بتوجهاتنا ناحية الأشياء... بموقفنا منها...

لو أنا راضي ومستريح على حاجة معينة... ها أبقى مبسوط...

حتى لو الظروف مش أحسن حاجة...

دي مسألة اختيار!

ممكن تختار إنك تبقى سعيد ومبسوط لو إنت عايز...

وممكن تختار تنكِّد على نفسك لأتفه الأسباب!

Taken in Perugia, Italy in July 2011

حاجة كمان...

يُقال: السعادة ليست في الهدف الذي تحاول الوصول إليه، لكن في الرحلة نفسها، في الطريق إلى الهدف...

ياما كنت فاكر إن السعادة في إني أوصل للهدف الفلاني...

إني أحصل على الشهادة دي...

إني أجيب العربية المعيَّنة...

إلخ!!!

لكن أول ما بأوصل... الموضوع بيفقد قيمته...

وبأكتشف إن السعادة كانت في السعي للوصول للهدف مش في الهدف نفسه!

جمال الطريق هو اللي ممتع مش الوصول لنهايته!

رحلة التسلق هي اللي ممتعة مش قمة الجبل!

عشان كدا السعادة مش هدف نوصل له، لكن رحلة بنعيشها!